راجہ ذوالقرنین خان انتقال کر گئے، سرکاری اعزاز سے تدفینAzad Kashmir

پانچ دہائیوں پر محیط سیاسی سفر

راجہ ذوالقرنین خان کا تعلق کسگمہ جاگیر کے حکمران خاندان سے تھا اور وہ راجہ محمد افضل خان کے صاحبزادے تھے۔ انہوں نے جموں و کشمیر لبریشن لیگ کی بنیاد رکھنے والوں میں شامل ہو کر اس کے پہلے سیکریٹری جنرل کی حیثیت سے خدمات انجام دیں۔ وہ 1975 میں سماہنی اور 1985 میں بھمبر سے آزاد کشمیر قانون ساز اسمبلی کے رکن منتخب ہوئے اور مالیات، منصوبہ بندی، صحت اور محصولات کے محکموں کے وزیر رہے۔ 1996 میں وہ کشمیر کونسل کے رکن منتخب ہوئے۔

2 اگست 2006 کو وہ آزاد جموں و کشمیر کے صدر منتخب ہوئے اور اگست 2011 تک مکمل پانچ سالہ مدت پوری کی۔ ان کے دور صدارت کو سیاسی پختگی اور وقار کی علامت سمجھا جاتا ہے۔ آزاد جموں و کشمیر یونیورسٹی کے چانسلر کی حیثیت سے انہوں نے میرپور یونیورسٹی آف سائنس اینڈ ٹیکنالوجی کے قیام میں اہم کردار ادا کیا اور اس کے لیے 5 ہزار کنال اراضی حاصل کی۔

ان کی زندگی کے دو لمحے خاص طور پر یاد رکھے جائیں گے۔ 14 اگست 1947 کو قیام پاکستان کے چند روز بعد انہوں نے سیالکوٹ میں ڈپٹی کمشنر کے دفتر پر قومی پرچم لہرایا تھا، اور ساٹھ برس بعد 14 اگست 2007 کو صدر کی حیثیت سے مظفرآباد میں صدراتی محل پر دوبارہ یہی اعزاز حاصل کیا۔ سیاست سے پہلے انہوں نے 1958 میں کراچی میں تعمیراتی کمپنی قائم کی تھی جس نے پاکستان، آزاد کشمیر، متحدہ عرب امارات اور عراق میں بڑے منصوبے مکمل کیے۔

صدر آصف علی زرداری نے ان کے انتقال پر گہرے دکھ کا اظہار کرتے ہوئے کہا کہ ان کی سیاسی و عوامی خدمات ہمیشہ یاد رکھی جائیں گی۔ چیئرمین سینیٹ یوسف رضا گیلانی نے ان کے صاحبزادے راجہ بابر علی ذوالقرنین سے ٹیلی فون پر تعزیت کی، جبکہ اسپیکر قومی اسمبلی ایاز صادق نے بھی ان کی خدمات کو خراج عقیدت پیش کیا۔