چیف جسٹس سرفراز ڈوگر نے شہری محمد شریف کی درخواست پر سماعت کرتے ہوئے تحریری حکم جاری کیا۔ عدالت نے سی ڈی اے کے ممبر اسٹیٹ کو ہدایت کی کہ وہ نادرا ای بیلٹنگ کا عمل اور متعلقہ پالیسی کے تحت بیلٹنگ 15 روز میں مکمل کریں۔
تحریری حکم سی ڈی اے حکام کے خلاف توہین عدالت کے مقدمے میں جاری کیا گیا، جس میں عدالتی ہدایات پر عمل نہ کرنے کا الزام ہے۔ عدالت نے خبردار کیا کہ اگر مقررہ مدت میں ہدایات پر عمل نہ ہوا تو چیئرمین سی ڈی اے کو ذاتی طور پر پیش ہو کر عدم تعمیل کی وجوہات بتانا ہوں گی۔
تحریری حکم کے مطابق سی ڈی اے کے وکیل نے 29 جنوری 2026 کو بیان دیا تھا کہ درخواستوں پر ایک ماہ میں غور کر کے انہیں نادرا ای بیلٹنگ کے عمل میں شامل کر لیا جائے گا۔ اس بیان کے بعد توہین عدالت کی درخواست نمٹا دی گئی تھی۔
عدالت کو بتایا گیا کہ معاملے کے بعض پہلوؤں کو مزید وضاحت درکار ہے اور اتھارٹی عدالت میں مزید مواد پیش کرنے کا ارادہ رکھتی ہے۔
درخواست گزار کے وکیل نے سی ڈی اے کے ڈپٹی ڈائریکٹر لینڈ اینڈ ری ہیبلیٹیشن کی جانب سے 26 جنوری 2026 کو جاری کردہ خط بھی پیش کیا۔ خط کے مطابق ممبر اسٹیٹ اور سی ڈی اے ڈپٹی کمشنر کی منظوری سے ایک ماہ میں نادرا بیلٹنگ کے ذریعے پلاٹ الاٹ کرنے کا فیصلہ کیا گیا تھا۔
عدالت نے مشاہدہ کیا کہ چونکہ یہ فیصلہ مجاز اتھارٹی نے منظور کیا تھا، اس لیے سی ڈی اے اس پر عمل درآمد کا پابند ہے۔
ایسوسی ایٹڈ پریس آف پاکستان کے مطابق چیف جسٹس نے منگل کو سماعت کے دوران پلاٹ الاٹمنٹ کے مقدمے میں عدالت کے پہلے حکم پر عمل نہ کرنے پر سی ڈی اے پر سخت ناراضی کا اظہار کیا تھا اور اتھارٹی کو 15 روز میں تعمیلی رپورٹ جمع کرانے کی ہدایت کی تھی۔ درخواست گزار نے بتایا تھا کہ عدالت نے 15 جون کو حکم جاری کیا تھا، لیکن ایک ماہ تک اس پر عمل نہیں ہوا، جس پر توہین عدالت کی درخواست دائر کی گئی۔
مقدمے میں سی ڈی اے کے وکیل کاشف ملک اور درخواست گزار کے وکیل حسنین حیدر تھہیم نے اپنے اپنے موکل کی نمائندگی کی۔








