خیبر پختونخوا میں سونے کی غیر قانونی کان کنی بندپاکستان

گورنر کنڈی نے کہا کہ غیر قانونی کان کنی میں ملوث افراد کے خلاف زیرو ٹالرنس کی پالیسی اپنائی جائے گی۔ انہوں نے کہا کہ لیز ہولڈرز اور ٹھیکیداروں کو کان کنی والے علاقوں سے بھاری مشینری ہٹانے کے لیے ایک ہفتے کا وقت دیا گیا ہے، اور مقررہ مدت میں مشینری نہ ہٹائی گئی تو اسے ضبط کر لیا جائے گا۔ انہوں نے بتایا کہ مجسٹریٹس نے پہلے بھی مشینری ضبط کر کے 30 ہزار روپے جرمانہ عائد کیا تھا، جبکہ قانون میں پانچ لاکھ روپے جرمانے کی گنجائش ہے، اور اس معاملے کی تحقیقات کی جائیں گی۔

گورنر نے کہا کہ غیر قانونی کان کنی کا دائرہ بہت وسیع تھا، جس میں 8 ہزار 350 ٹریکٹر اور ٹریکٹر ٹرالیاں، ایک ہزار 730 بھاری ڈمپر اور بڑی تعداد میں مزدور استعمال ہو رہے تھے۔ انہوں نے کہا کہ کوہاٹ میں معدنی بلاکس سی اور ڈی موجود ہیں اور ایک کان کنی بلاک 4 ارب 92 کروڑ روپے میں لیز پر دیا گیا تھا، جو ان وسائل کی اہمیت کو ظاہر کرتا ہے۔

گورنر کنڈی نے کہا کہ غیر قانونی کان کنی سے حاصل ہونے والی رقم دہشت گردی اور پاکستان کے خلاف استعمال ہو رہی تھی۔ انہوں نے کہا کہ اس غیر قانونی کاروبار میں ملوث عناصر دہشت گردوں کو بھتہ دیتے تھے اور ان سے تحفظ حاصل کرتے تھے، جس سے معدنیات کی غیر قانونی نکاسی کا براہ راست تعلق صوبے کی سکیورٹی صورتحال سے جڑتا ہے۔

گورنر نے کہا کہ گزشتہ 13 برسوں کے دوران صوبے کے وسائل کو لوٹا گیا ہے اور معدنیات خیبر پختونخوا کے عوام کی امانت ہیں۔ انہوں نے کہا کہ امن اولین ترجیح ہے اور دہشت گردی کے خلاف جنگ میں شکست کی کوئی گنجائش نہیں۔ انہوں نے مزید بتایا کہ دو روز قبل انہوں نے اسلام آباد میں ایک اہم کانفرنس میں شرکت کی تھی، جہاں سکیورٹی صورتحال پر غور کیا گیا۔