وفاقی وزیر برائے پارلیمانی امور ڈاکٹر طارق فضل چوہدری نے قبل از وقت عام انتخابات کے امکان کو مسترد کرتے ہوئے کہا ہے کہ انتخابات وقت سے پہلے کرانے کی کوئی وجہ نہیں اور موجودہ حکومت اپنی آئینی مدت پوری کرے گی۔
ریفرنڈم کے حوالے سے جاری بحث پر بات کرتے ہوئے انہوں نے کہا کہ ریفرنڈم آئین میں موجود ایک اہم آئینی اور سیاسی آپشن ہے، جس کے ذریعے کسی بھی معاملے پر براہ راست عوامی رائے معلوم کی جا سکتی ہے۔ کسی متنازع معاملے پر عوام سے پوچھا جا سکتا ہے کہ وہ کیا چاہتے ہیں۔
طارق فضل چوہدری کے مطابق کسی رہنما کے بیان سے آئین میں موجود ریفرنڈم کا آپشن غیر آئینی نہیں ہو جاتا۔ انہوں نے کہا کہ عوامی رائے سامنے آنے کے بعد اس پر عمل درآمد کا طریقہ کار طے کیا جا سکتا ہے۔
وفاقی وزیر نے صدر آصف علی زرداری اور وزیراعظم شہباز شریف کی ملاقات کے بعد مثبت پیش رفت کی امید ظاہر کرتے ہوئے کہا کہ ملک کے مفاد میں بہتر فیصلہ سامنے آئے گا۔ صدر اور وزیراعظم نے مسائل کو مشاورت سے حل کرنے پر اتفاق کیا تھا اور اس ملاقات کو سیاسی کشیدگی کم کرنے کی جانب ایک قدم قرار دیا جا رہا ہے۔
انہوں نے واضح کیا کہ انتخابات اور ریفرنڈم دو الگ الگ آئینی و سیاسی عمل ہیں اور دونوں کے مقاصد بھی مختلف ہیں۔ انہوں نے کہا کہ انتخابات کو شفاف بنانے کے لیے انتخابی اصلاحات کمیٹی قائم کی گئی ہے۔
نئے صوبوں کے قیام کے لیے ریفرنڈم کی تجویز پر سیاسی حلقوں میں شدید اختلاف پایا جاتا ہے۔ پاکستان پیپلز پارٹی کے چیئرمین بلاول بھٹو زرداری نے ریفرنڈم کو پچھلے دروازے کا راستہ قرار دیتے ہوئے اس کے بجائے چھ ماہ کے اندر عام انتخابات کا مطالبہ کیا ہے اور کہا ہے کہ نظام کی درستگی کا آغاز پارلیمنٹ سے ہونا چاہیے۔
دوسری جانب وزیر اطلاعات عطا اللہ تارڑ اور ڈاکٹر طارق فضل چوہدری نے ریفرنڈم کو عوامی رائے جاننے کا آئینی اور قانونی طریقہ قرار دیتے ہوئے اس کا دفاع کیا ہے۔ ریفرنڈم کا خیال رواں ماہ کے شروع میں وزیر داخلہ محسن نقوی نے پیش کیا تھا اور اس کے بعد سے حکومت اور اتحادی جماعتوں کے کئی رہنماؤں نے اس کی حمایت کی ہے۔








